Анын айтымында, жаңы Баш Мыйзамдын долбооруна элдик курултайдын концепциясы киргизилгендиктен, ошого жараша республика элдик болушу керек.
“Элдик бийлик кирип жаткандан кийин өлкөнүн аталышында эл деген сөз туруш керек. Баштаганда эле ушундан башташ керек”, – деди ал.
Кошалиев Конституциянын долбоорунда демократиянын механизмине көп көңүл бурулуп, биринчи жолу курултай сыяктуу институт киргизилип жаткандыгын кошумчалады. Ал демократиянын принцибин бекемдөө үчүн жана эл өз укугун унутпашы үчүн, элдин эркинин үстөмдүгүн республиканын расмий аталышында көрсөтүү керек деп эсептейт. Бул үчүн Конституциялык кеңешменин мүчөсү анын атын Кыргыз Эл Республикасы деп өзгөртүүнү сунуштады.
