Домой Коом Окуучулар жетишпей калса видеосабактарды кайра көрсө болот (сайттардын тизмеси)

Окуучулар жетишпей калса видеосабактарды кайра көрсө болот (сайттардын тизмеси)

89

 

Өлкөдөгү эпидемиологиялык кырдаалга карата 1-класстан башкалары  дистанттык формада окуп жатышат. Эгерде окуучу кандайдыр бир себептерден улам онлайн сабактан кечигип же түшүнбөй калса, ал сабакты кайра сайттардан издеп таап алса болот.  Билим берүү жана илим министрлигинин маалымат кызматы видеосабактар, электрондук китептер жайгаштырылган сайттарды тизмектеп, алардын артыкчылыктарын айтып берди.

Эске салсак, өлкө боюнча 2-11-класста окугандар эпидемиологиялык кырдаалдан улам аралыктан билим алышууда.

Окуучулар үчүн видеосабактар ЭлТРдин «Илим жана Билим» (5-11-класс), КТРКнын «Баластан» (1-4) телеканалдарынан берилүүдө.

«Эфирге чыккан видеосабактардын баары министрликтин сайтына жана билим берүү порталына жарыяланып жатат. oku.edu.gov.kg порталында мугалим, ата-энелер үчүн методикалык иштелмелер дагы жайгаштырылган», — деп айтылат маалыматта.

Мындан сырткары, kitep.edu.gov.kg/kg электрондук китепканасы иштеп жатат. Бул жерге 700дөн ашуун мектеп программасына тийиштүү китептер үч тилде (кыргыз, орус жана өзбек) жайгаштырылган. Маалым болгондой, ал жакта тиешелүү бөлүмдөргө кирип, классты тандап, ар бир предмет боюнча китептерди көчүрүп алууга же болбосо ошол жерде онлайн окууга да болот.

Окуу китептерин https://lib.kg/lib/school/ дарегинен да табууга болот.

ibilim.kg сайты башталгыч класстар үчүн иштелип чыккан. Бул сайт кошумча билим берүү ресурсу катары сунушталат.

«Билим булагы» сайты математика, физика, химия, биология, география, тарых, дүйнөлүк жана кыргыз адабияты, англис тили боюнча 5-9-класстарга арналган.

Кошумча билим берүү тиркемелери:

MEGA24 мобилдик тиркемеси. Анын «Санарип мектеп» бөлүгүндө эфирден чыгарылган видеосабактар жайгаштырылууда. Тиркемени колдонууга окуучулардын интернет трафиги коробойт.

Zoom жана WhatsApp мобилдик тиркемелери. Бул тиркемелер аркылуу мугалимдер окуучулар менен кайтарым байланышты уюштура алышат.