Дүйшөмбүгө караган түнү митингчилер Ак үйдү басып алышкан. Президентке импичмент жарыялоо чакырыктары айтылууда. Кыргызстандын Конституциясында президенттин мөөнөтүнөн мурда кетүүсү үчүн төрт вариант каралган.
Конституцияда президенттин ыйгарым укуктарын мөөнөтүнөн эрте токтотуучу шарттар жазылган.
Конституцияда жазылган варианттар:
- кызматтан кетүү тууралуу арыз;
- импичмент;
- ден соолугуна байланыштуу милдетин аткара албай калышы;
- өлүмү.
Баш мыйзамда экинчи жана үчүнчү варианттар тууралуу кенен түшүнүк берилген.
Импичмент
Президентти кызматынан өтө оор кылмыш жасады деген парламенттин айыптоосунун негизинде гана четтетүүгө мүмкүн. Ал башкы прокурордун корутундусу менен тастыкталышы керек. Төмөндө этаптары келтирилди:
— президентке айып тагуу тууралуу Жогорку Кеңештин чечими депутаттардын көпчүлүгүнүн добушу менен кабыл алынышы керек. Мында эл өкүлдөрүнүн үчтөн бир бөлүгү демилгечи болуп, парламентте түзүлгөн атайын комиссиянын корутундусу болушу шарт;
— экс-президент макамынан ажыратуу чечими депутаттардын үчтөн эки бөлүгү тарабынан күнөө тагылгандан үч айдан кеч эмес убакытта кабыл алынышы зарыл. Эгер маалынан өтүп кетсе, айып четке кагылат.
Ден соолукка байланыштуу
Эгер президент саламаттыгынан улам ыйгарым укуктарын аткара албай калса, Жогорку Кеңеш өзү түзгөн мамлекеттик медициналык комиссиянын корутундусунун негизинде мөөнөтүнөн эрте бошотуу чечимин кабыл алат. Буга дагы ЖК депутаттарынын үчтөн эки бөлүгүнүн добушу керек.
Президенттин милдетин ким аткарат
Жаңы өлкө башчысы шайлангыча анын милдетин Жогорку Кеңештин төрагасы аткарат. Эгер спикердин буга мүмкүнчүлүгү жок болуп калса, кызматты премьер-министр же анын милдетин аткаруучу аркалайт.
Эскерте кетсек, Кыргызстандын биринчи жана экинчи президенттери Аскар Акаев менен Курманбек Бакиев каршылык акцияларынан улам кызматтан кетүүгө аргасыз болушкан.
булак: sputnik.kg
