Хьюстондогу Райс университетинин адистери планетанын экономикасына роботтор кандай таасир тийгизерине божомол жасаганга аракет кылышкан.
Моше Варди менен анын кесиптештери убакыттын өтүшү менен калктын ар кандай катмарынын жашоо деңгээли кандай өзгөрөөрүн аныктап чыгышкан. Окумуштуулар кара жумуш аткарган жумушчулар роботторго караганда арзан турушат деген жыйынтыкка келишкен. Роботтоштуруудан коомдун ортоңку катмары көбүрөөк жабыр тартат. Коомдук транспорттун айдоочулары, мамлекеттик кызматкерлер, чоң дүкөндөрдөгү сатуучулар, тамак-аш комбинатынын жумушчулары жана башка жумуш ордунда акыл эмгегин аз талап кылган кызматкерлер жумушун жоготууга көбүрөөк дуушар болушат экен. Бул деген жакынкы келечекте акыл эмгеги биринчи орунга чыгат дегендик. Роботтоштуруунун таасири Кытай менен Индияда көп байкалат. АКШда болсо, жумушчулардын үчтөн бир бөлүгү жумуш ордунан ажырашат. Кандай болгон күндө да жаштар келечек жумушун акыл эмгегине байланыштыруу менен жумушсуз калбай тургандыктарын эске алышса.
Аида Мусаева
