Кечээ “Акнет” компаниясынын кызматкерлери Бишкек шаардык сотунун имаратынын алдына митингге чыгышып, компаниянын негиздөөчүлөрүнүн бири Кубан Ажимудиновдун баш коргоо чарасын өзгөртүүгө каршы чыгышты. Акнет ЖЧКсынын аткаруучу директору Азат Базаркулов билдиргендей, компаниянын кызматкерлери соттун жанына чогулушкандыгынын себеби буга чейин Ажимудиновдун өкүлдөрү бул жерде сөз сүйлөп, сотту коркутушкан.
“Негиздөөчүлөрдүн ортосундагы талаш-тартыштар тиешелүү органдарда өтүп, кызматкерлердин көңүлүн оорутпоосун өтүнөбүз. Ажимудиновго келтирилген чыгым 700 миллион сомдон ашуун. Эми биз Ажимудиновдун өкүлдөрү сот органын коркутпай жана кызматкерлердин ишине кийлигишпесин деп жатабыз”, – деди А.Базаркулов.
“Акнет” ЖЧКнын президенти Нурбек Абасканов кошумчалагандай, Ажимудиновго уюштуруучу катары эч кандай дооматтар жок, бирок компанияны жетектеген 20 жыл ичинде салык жана социалдык камсыздандыруу төгүмдөрүн төлөө боюнча суроолор бар.
«2018-жылы Ажымудиновду толук башкаруу учурунда 152 миллион сом салык төлөнсө, 2020-жылы компаниянын жаңы жетекчилиги 300 миллион сом төлөдү – бул эки эсе көп. Кошумчалай кетсек, 2018-жылы бюджетке социалдык чегерүүлөр 12 миллион сомду түзсө, учурда 102 миллион сом, 8,5 эсе көп. Эмне үчүн учурда кызматкерлер Соцфондду кайтарып берүү маселесин көтөрүп жатышат? Себеби ушул жылдар аралыгында Социалдык фонд декларацияланган эмес же төлөнгөн эмес. Кызматкерлер Ажимудинов кайтып келсе, эски режим дагы кайтып келет – кайрадан ачык эмес система пайда болот деп коркушат», – деди Абасканов.
