Домой Коом Вируска карабай күздө шайлоо өтөт

Вируска карабай күздө шайлоо өтөт

62

Президент Сооронбай Жээнбеков «Жогорку Кеңештин депутаттарын шайлоону дайындоо жөнүндө» жарлыкка кол койду. Жарлыкка ылайык, парламенттин VII чакырылышына депутаттарды шайлоо 4-октябрга дайындалды.

Шайлоо жана референдум өткөрүү боюнча борбордук комиссиясына (Боршайком) шайлоону өлкө мыйзамдарына ылайык уюштуруу тапшырмасы берилди.

Өкмөткө шайлоону өткөрүү үчүн зарыл болгон финансы каражаттарын Боршайком бекиткен чыгымдардын сметасына ылайык бөлүп берүү жагы тапшырылды.

Башкы прокуратура шайлоону даярдоодо жана өткөрүүдө Конституциянын жана өлкө мыйзамдарынын сакталышын камсыз кылууга милдеттүү болот.

Жергиликтүү бийлик жетекчилерине шайлоого даярдык көрүүдө жана өткөрүүдө шайлоочулардын тизмелерин түзүү, тактоо, уюштуруучулук-техникалык маселелерди чечүү боюнча тиешелүү органдардын жана шайлоо комиссияларынын ишине көмөк көрсөтүү боюнча тапшырма берилди.

Быйыл коронавирус эпидемиясынан улам жарыялаган өзөчө кырдаалга байланыштуу 12-апрелге белгиленген жергиликтүү кеңештерге шайлоо өтпөй калган. Жогорку Кеңештин айрым депутаттары эки шайлоону чогуу өткөрүүнү сунушташкан.

Боршайком парламенттик шайлоого даярдык көрүүнүн жана өткөрүүнүн графигин былтыр 17-октябрда жарыялап, бул иш-чара 4-октябрда өтөрүн билдирген. Шайлоону уюштурууга жана өткөрүүгө 560 миллион сом талап кылынарын маалымдаган.

Быйыл 30-июнда президент шайлоо босогосун жети пайызга чейин түшүрүү тууралуу мыйзамга кол койгон.

Азыркы, VI чакырылыштагы парламент 2015-жылдын октябрында шайланган. 120 орунга алты партия өтүп, КСДП фракциясына 38 мандат, «Республика Ата-Журтка» 28, «Кыргызстанга» 18, «Өнүгүү Прогресске» 13, «Бир Болго» 12 жана «Ата Мекенге» 11 орун тийген.