Домой Коом Усубалиев өзү текшерчү — ири объектилердин архитектору Жумакалиев

Усубалиев өзү текшерчү — ири объектилердин архитектору Жумакалиев

70

Кыргыз ССРинин эмгек сиңирген архитектору Анарбек Жумакалиев республикадагы бир катар ири курулуштардын башында турган. Ардагер куруучу менен Sputnik Кыргызстан агенттигинин кабарчысы маек курду.
Анарбек Жумакалиев борбор калаадагы «Сейтек» улуттук балдар жана өспүрүмдөр борборунун, Чыңгыз Айтматов атындагы орус драма театрынын, «Манас» эл аралык аэропортунун аэробекетинин жана «Ата-Бейит» улуттук тарыхый-мемориалдык комплексинин авторлорунун бири. Ал Ташкенттеги жогорку окуу жайда билим алып, 1969-жылы «Кыргызгипрокурулуш» мамлекеттик долбоорлоо институтунда узак жыл эмгектенип, 1980-жылы 35 жашында Кыргыз ССРинин эмгек сиңирген архитектору болгон.
Анын айтымында, өлкөдөгү ири курулуштарды республика башында тургандар өздөрү көзөмөлдөгөн.
«Манас» эл аралык аэропортунун аэробекетин салып жатканда ишемби сайын Турдакун Усубалиев келип текшерип кетчү. Ал киши мени ээрчитип алып, бул жагы кандай болот, тиги жагычы деп улам суроо берип, баарын кыдырып чыкчу. Үч кабаттуу аэровокзалдын узундугу  — 195, туурасы 72 метр. Аэровокзал куруу боюнча мамлекет бекиткен өзүнчө норма бар эле. Учуп келгендер биринчи кабаттан кирсе, учуп кете тургандар экинчи кабаттан кетип, бири-бирине тоскоолдук жаратпайт. Ашкана, күтүү залы, кампа өңдүү кошумча курулуштар курулган. Бир саатта 1 700 адамды учурганга ылайыкталган. Союз маалында көзөмөл күчтүү болчу. Архитектордун жумушу — тышкы, ички көрүнүшүн, аянтты туура пайдаланууну  эсептеп чыгуу. Куруучулардын жасаган ишинин сапатын, нормага туура келип жатканын текшерүү. Жадагалса театрга келген көрүүчүнүн отургучунун бийиктиги, узун-туурасына чейин эсептеп чыкчубуз», — деди Жумакалиев.
Ардагер архитектор кесиптештери менен «Ата-Бейит» улуттук тарыхый-мемориалдык комплекси үчүн 2002-жылы Токтогул атындагы мамлекеттик сыйлыгына татыган.