Домой Коом УКМК: Камчы Көлбаев ден соолугуна байланыштуу №47 түзөтүү жайына которулду

УКМК: Камчы Көлбаев ден соолугуна байланыштуу №47 түзөтүү жайына которулду

110

УКМК Көлбаев жакынкы күндөрү бошотулат деген маалыматты таратпоону өтүнөт. Ал ден соолугуна байланыштуу түзөтүү жайына которулган.

Кримтөбөл Камчы Көлбаев ден соолугуна байланыштуу Бишкектеги №47 түзөтүү абагына которулду. Бул тууралуу УКМКнын маалымат кызматы кабарлады.

Ал 2-ноябрда УКМКнын убактылуу кармоо жайынан камакка алынган жана кесилгендерге медициналык жардам көрсөтүүчү абак жайга которулган.

УКМК Коопсуздук кеңешинин мурдагы катчысы Кеңешбек Дүйшөбаевдин кримтөбөлдүн бошотулушу боюнча «ыкчам маалыматы» тастыкталбаганын эскертип, Көлбаевдин абактан бошоору тууралуу такталбаган кабарларды таратпоону өтүнөт.

Атайын кызмат коррупция жана криминалга каршы аёосуз күрөш жүрүп жатканын кошумчалайт.

27-октябрда кызматынан алынган Дүйшөбаев маалымат жыйында кримтөбөлдү колго түшүрүү боюнча чоң шоу ойнотулганын айткан. Ал «ыкчам маалыматы» боюнча сот Көлбаевди ошол эле күнү же эртеси бошотуп жиберет деген. Дүйшөбаевдин тастыкташынча, эгер аны бошотпосо, кылмыш чөйрөсү учурдагы бийликке доомат коёт. Коопсуздук кеңешинин мурдагы башчысы бул айтылгандары толук тастыкталган маалымат эмес экендигин да белгилеген.

Көлбаев 22-октябрда Бишкектеги спорттук клубдардын биринде кармалган. УКМКнын маалыматы боюнча, кримтөбөл уюшкан кылмыштуу топтордун ишмердүүлүгүн аныктоо жана бөгөт коюу боюнча иш-чаралардын алкагында алынган маалыматтын негизинде колго түшүрүлгөн. Материалдар Кылмыш кодексинин 249-беренеси («Кылмыштуу топ түзүү же ага катышуу») боюнча катталган.

24-октябрда Биринчи май райондук сотунун чечими менен Көлбаев тергөө бүткөнгө чейин камакка алынып, УКМКнын убактылуу кармоо жайына киргизилген. Кийин Бишкек шаардык сотуна апелляциялык арыз түшүп, бирок аны жактоочулар кайра артка кайтарып алышкан.

булак: sputnik.kg