БШКнын шайлоо өнөктүгүндөгү мыйзам бузууларды аныктоо боюнча жумушчу тобу ырчы Бек Борбиевге айып пул салуу чечимин кабыл алды. Бул тууралу БШКнын басма сөз кызматы билдирет.
Жумушчу топ ырчынын аракетин эрте үгүт деп таап, Бузуулар кодексинин 44-беренесине ылайык жазалоо чечимин кабыл алган .
Натыйжада Бек Борбиевге 7,5 миң сом айып пул салынды.
Эске салсак, ырчы “Мекеним Кыргызстан” аттуу видеотасманы интернетке тараткан. Ал партиянын гимнин өз каалоосу менен жазганын билдирди. Видеодо саясий уюмдун логотиби колдонулган.
БШК 2020-жылдагы шайлоого катышууну көздөгөн партиялардан келип түшкөн документтерди текшерүүнү улантууда.
Үгүт иштери 4-сентябрда башталат.
Булак: kyrgyztoday.org
