«Геологиялык-экономикалык изилдөөлөрдүн Кыргыз методикалык экспедициясы» мамлекеттик ишканасынын директору Жаныбек Дүйшеев кол алдындагы кызматкер аялга «төшөк мамилесин сунуштаганы» боюнча ызы-чуудан кийин өз каалоосу менен кызматтан кетүү тууралуу арыз жазды. Бул тууралуу Дүйшеев: Vesti.kg сайтына «Бул окуя ишкананын ичинде эле эмес, бүткүл Кыргызстанга жайылып кетти. Юридикалык баа берилгичекти мен убактылуу кызмат ордумдан кетип жатам» – деп маалымдады.
Эске салсак, 12-октябрда «Геологиялык-экономикалык изилдөөлөрдүн Кыргыз методикалык экспедициясы» мамлекеттик ишканасынын кызматкери мекеменин жетекчиси ага бир нече ирет төшөк мамилесин сунуштаганын билдирген. Аял интернетке экөөнүн сүйлөшкөн аудио жазуусун жүктөп, кийин Биринчи май районунун ИИБне арыз менен кайрылган.
Булак: «Фабула»
