Домой Тагдыр Гүлназ: “Эки күйөөгө тийсем да, мен издеген бакытты табалбадым”

Гүлназ: “Эки күйөөгө тийсем да, мен издеген бакытты табалбадым”

48

Бүгүнкү каарманыбыз бир учурда ала качуунун курмандыгы болуп, акырында жактырбаган күйөөсү менен ажырашып тынган экен. Кийинчерээк сүйүктүү адамына жолугуп бактылуу жашап аткан учурда анысы мурунку аялына кетип калыптыр. “Жан дүйнөнүн байлыгынан материалдык байлыкты жогору койгон эркектер болот турбайбы”-деп баса белгилеген Гүлназдын бул баянын башкаларга сабак болушу үчүн жарыяламакчыбыз. 

—Студент кезимде биринчи жолдошум ала качып кеткен болчу. Чындыгында сүйбөгөн адам менен үй-бүлө куруу абдан кыйын экен. Азирет экөөбүз  кыздуу болгондон кийин ажырашууга туура келди. Анткени аракка жакын болгону аз келгенсип катынпоз эле. Кээде үйгө да келбей калчу. Бир күнү адаттагыдай мас болуп келип:

—Сен мени жакшы көрбөйсүӊ. Үйгө түнөбөй калсам эч маани бербейсиӊ. Демек, сенин  менден башка жактырган адамыӊ бар болуш керек,-деди оозу ашаткы жыттанып.

Бул сөздү укканда кыжырым кайнап өзүмдү кармай албай:

—Сасыган алкаш! Сени ким жакшы көрсүн?! Үйгө келбей калмак түгүл, ошондон ары биротоло жоголуп кетсеӊ жакшы болмок!-дедим муундарым титиреп.

Ал мени ушундай абалда биринчи жолу көрүп жаткандыктан кадимкидей соолуга түшкөнсүдү. Анан өзүнчө күбүрөнүп алып сыртка чыгып кетти. Ага чейин кол көтөрсө ыйлап тим болчу элем. Мени ала качып бактысыз кылганын күн сайын ойлоп жүрүп ачуулуу болуп калгандыктан, эми мындан кийин өзүнө жараша мамиле жасоону чечкен элем. Ал ошол бойдон дайынын билгизбей бир жума жоголду. Ошондо кайненеме иштин жайын түшүндүрүп, бул үйгө эч бүлө боло албасымды айткандан кийин кызымды алып шаарга жөнөдүм. Андан соӊ өзүм окуган институттун жатаканасынан бир бөлмө алдым. Окуумду бүткүчө жалгыз бой эне катары оор турмушту башымдан өткөрдүм. Кызымдын атасы окуган жериме көп эле жолу келип жолугуп кечирим сурап, жараша турган оюн айтканда таптакыр макул болбой койдум. Эркектин баарын ага салыштырып бир топ жыл жалгыз бой жүрдүм. Убакыттын өтүшү менен кызым да чоӊоюп студент болду. Өзүм мамлекеттик кызматкер болгондуктан алган маянымдын теӊин жашаган батирге төлөгөндүктөн экөөбүз теӊ кыйналып кеттик. Кызымды эл катары кийинткенге акчам тартыш болуп жатты. Жашоодо акыркы учурларда көп кыйналгандыктан: “Кудай эми мени жакшы адамга туш кыла көр!”-деп тиленип жүргөн күндөрдүн биринде күтүүсүздөн сүйүктүү адамыма жолугуп калдым. Данияр  жеке турмушум тууралуу менден шашпай маалымат алгандан кийин:

—Коенегим… Ушинтип айтканым үчүн кечирип койчу. Сен ала качуунун курмандыгы болуп бактысыз болсоӊ, а мен ата-энемдин айтканынан чыга албай өзүмө жакпаган кызга үйлөнүп турмушум бузулду. Эми экөөбүз бактылуу болобуз. Мага турмушка чыгасыӊбы, ыя?-деп колумду сураганда ошол замат макул болдум.

Анткени жалгыздыктан абдан тажап жүргөн элем.  Кубанычтан көзүмдөн жашым куюлуп:

—Мен сага ыраазымын. Бирок, менин кызымды өгөйсүнтпөйсүӊбү?-десем ал мен көкүрөгүнө кысып сооротуп:

—Жок… Мен андай адам эмесмин. Сага окшош коенекти эмнеге өгөйлөмөк элем? Көрөсүӊ го баары жакшы болот,-деп көӊүлүмдү көтөрдү.

Акыры экөөбүз эки жумадан кийин турмуш курдук. Данияр менен кызым Айданектин тез эле тил табышып кеткенине жетине албай жүрдүм. Айданекти кээде тилдеп койсом анын таламын талашканы ого бетер жүрөгүмдү жылытты. Кыскасы, дүйнөдө үчөөбүздөн өткөн бактылуу жан жоктон бетер телегейибиз тегиз эле… Биздин ынтымактуу жашап атканыбызды көрө албаган жолдошумдун туугандарынын ар кандай кеп-сөзүнүн кесепети үй-бүлөбүзгө тийе турган учур келди. Бул тууралуу кыжалат болуп Даниярга айтсам:

—Сен андан эч кам санаба. Алар келжирей беришет,-деп бардык маселени өзү чече тургандай түр көрсөттү.

А мен анын мындай  сөзүнө ишенип жүргөн кезде мурунку аялы менен жолугуп жүргөн экен. Анысы бирөөлөрдөн укканыма караганда базарда иштеп акчаны көп табат окшойт.

Бир күнү үйгө кычыраган машинаны айдап келип калды.

—Бул машинаны кайсы акчаӊа алдыӊ?-дедим таӊ калып.

Данияр мурдагыдай күлүмсүрөбөй кабагын бүркөп:

—Сенин кандай ишиӊ бар? Курсагыӊ ток, кийимиӊ бүтүн болгондон кийин кийлигишпе да,-деп орой жооп берди.

Жүрөгүм бир жамандыкты сезип:

—Балким, мурунку аялыӊ сатып бергендир,-десем кебетесин бузуп, мени жактырбагансып колун шилтеп тетири басты.

Бир аздан кийин:

—Мен сени менен ажырашмай болдум. Досторумдун баары бутуна туруп жатат. Андыктан мен мурунку аялым менен кайра жарашмай болдум. Анын мага өзү эмес, сага караганда көбүрөөк тапкан акчасы керек,-деди ачык эле айтып.

Экөөбүз андан кийин акыйлашып отурбастан дароо ажырашууну чечтик. Ал азыркы кезде мурунку аялы менен жашап атат. А мен кызым менен мурункудай  эле батирде  тирилигимди өткөрүп жатам. Даниярдан мен мындайды күткөн эмес элем. Көрсө, жашоодо жан дүйнөнүн байлыгынан материалдык байлыкты жогору көргөн эркектер деле болот турбайбы. Эми эмне демекчимин? Жаман болсо да аман болсун…

Нурпери  ИСАБЕКОВА

Булак: Багыт