Дубай кыялым эле
— Үй-бүлөдө төрт бир туугандын эң кичүүсүмүн. Жалал-Абад шаарындагы №1 мектеп-гимназияны аяктаган соң, Бишкек шаарындагы Жусуп Баласагын атындагы Кыргыз улуттук университетинен билим алып чыккам. Дубайда эки жылдан бери эмгектенип келем. Бул жакта бокс, эрежесиз эр уруш, кикбокс боюнча персоналдык машыктыруучу болуп иштейм. Негизи бала кезимден эле спортко кызыкчумун. Кыргызстанда көптөгөн мелдештерге катышып жүрчүмүн.
11-классты аяктарда Дубайга барып, машыктыруучу болом деген максатты коюп, аталган шаар жөнүндө маалыматтарды интернеттен изилдедим. Мектепте бирге окуган досторум бул кыялым жөнүндө билишчү. Ошондо эле аларга «балдар, мен Дубайга барууну кыялданам. Кыргызстандын желегин ошол жактан желбиретким келет» деп айтчумун. Ошентип жогорку окуу жайга барганда англис тил курсуна да барып жүрдүм. Университеттен дипломумду алган жылы долбоорлор аркылуу баарлашуудан өтүп, Дубайга жолдомо алдым.
Аджман
— Бирок дароо эле машыктыруучу болуп жумушка орношкон жокмун. Бардык эле мекендештердей болуп катардагы жумуштардан баштадым. Алгач официант болуп иштеп жүрдүм. Аджман деген шаарда иштеп жүрдүм. Аджмандан Дубайга чейин 2 сааттык жол. Бул жерде кыйын күндөр өттү. 5,5 ай бул жерде официант болуп иштедим. Жумасына бир эле жолу эс алчубуз. Бирок мен бир да жолу эс алган жокмун. Себеби, ар бир эс алуу күнү Дубайга барып, жумуш издечүмүн. Себеби башка күндөрү барып-келгенге жетишпейсиң. Аджманда туруп, Дубайдан жумуш табуу аябай кыйын болду. Бул жер аябай кичинекей шаар. Ошол себептен спорт тармагындагы жумушту Дубайдан гана тапса болот.
Дубай
— Ошентип 5,5 айдан кийин Дубайга которулуп кеттим. Бул жерде официант болуп 2,5 ай иштеп, Кудайымдын буйругу менен өзүм эңсеген жумушумду таптым. Дубайга келип, официант болуп иштеген маалда абдан кыйналдым. Ортодо ар кандай жумуштарга да кирип иштедим. Кыскасы, көздөгөн максатыма жетүү үчүн баарына чыдадым. Кыйынчылыктардын артында сөзсүз жакшы күндөр бар экенине ишендим.
3 компания жумушка чакырды
— Көп өтпөй спорттук залга 3 фирмадан чакыруу түштү. Үчөөнүн тең маектешүүсүнөн өтүп, үчөө тең келишим түзөбүз деди. Аябай сүйүндүм. Мени алар тандабай эле, мен үчөөнүн бирөөсүн тандамай болдум. Ошентип арасынан эң жакшысын тандадым. Мен тандаган компаниянын сынагына 140 талапкер катышып, алты гана адам өтүптүрбүз.
3 айдын ичиндеги ийгилик
— Кудайым буюрса баары жакшы. 11 айдан бери тынымсыз эмгектенип, бир топ ийгиликтерге жетиштим. Иштегениме 3 ай болгондон кийин мен үч жолу катары менен «Эң мыкты машыктыруучу» наамын алдым. Жумушумду абдан жакшы көрөм. Азыр дагы эс албайм. Баары таң калышат.
— Мурда официант болуп иштеп жүргөн кезимде тапкан акчамды чогулта алган жокмун. Себеби бул жакта машыктыруучу болуш үчүн сертификат сатып алышым керек эле. Аны сатып алдым. Ошондой эле автоунаа айдаганга күбөлүк алдым. Жакында Кыргызстанга барып ата-энеме жолугуп, атама автоунаа алып берип келдим.
Жумуш шарты
— Жумушумдун шарты мындай: Бизде бир дагы машыгуу залы жок. Бизди компания кардарлардын үйүнө жиберишет. Кардарды өзү каалаган жерге барып машыктырам. Дубайда персоналдык машыктыруучунун кызмат акысы абдан кымбат. Ошол себептен биздин кызматты баары эле колдоно албайт. Көбүнчө арабдар, европалыктар машыгышат.
Биз Дубайдын экономикасынан 50 жыл артта калгандай сезим калтырат. Бул таң кала турган шаар. Баары таза иштешет. Ал эми адамдардын мүнөзү ар кандай. Бизде акыркы убакта адамдар агрессивдүү, маанайы жок болуп калганын байкасак болот. Ал эми Дубайда баары көңүлдүү, күлүп жүрөт. Бирок биздин меймандостугубузга эч ким жетпесе керек.
Кызыктуу окуя
— Жумуш үстүндөгү бир кызыктуу окуяны айтып берейин. Официант болуп иштеп жүргөндө абдан көңүлсүз иштечүмүн. Анткени башында айткандай менин кыялым башка эле. Машыктыруучу боюнча жумуш издеп, ошого даярданып жүргөн кезимде менеджерге менин үстүмдөн даттанып, төрт жолу алып киришти. Төртүнчү жолу жумуштан кетиребиз деп калган. Мен эртең менен саат жетиден онго чейин сертификат алуу үчүн окуп, саат бирден кечки саат тогузга чейин жумушум бар эле. Анан берилген тапшырмаларды жумушта жүргөндө окуганга туура келчү. Жумуштагы намазканага кирип, дептеримди ачып сабак окучумун. Себеби бизде менеджердин көбү индустар болчу. Алар намазканага кире алышпайт. Ошентип отуруп, мени кетиребиз дегенде мен дагы бир шанс сурадым. Эртеси акыркы компанияга маектешүүгө бармакмын. Аталган компанияга кирип, колго келишимди алдым. Ошол жердеги менин кубанычымды айтсаң сөз жетпейт. Анан мурунку жумушума барып, кетүү үчүн арызымды жазып, менеджерге компания менен түзгөн келишимди көрсөттүм. Ал менеджер мени жаман көзү менен карап, кызарып кеткен.
Келечектеги максаттарым
— Дайыма максат коюп жашап келем. Спорт тармагында, бизнес жаатта көздөгөн кыялдарым бар.
Негизи адам баласы бир максатка жетем десе, сөзсүз кыйынчылыктар болот экен. Сен ошол кыйынчылыктарды жеңсең, анан көздөгөн максатыңа жетесиң. Жаштарга алдыдан чыккан азап-тозокторго баш бербей тырышып окугула, иштегиле демекчимин.
Булак: Турмуш
