Домой Коом Быйыл согуштун ардагерлерине 100 миң сомдон берилет

Быйыл согуштун ардагерлерине 100 миң сомдон берилет

11
Президент Садыр Жапаров Улуу Ата Мекендик согуштун ардагерлерине бир жолку материалдык жардам көрсөтүү үчүн каражат бөлүү жөнүндө тескемеге кол койду. Бул тууралуу өлкө башчынын маалымат кызматы билдирди.
2022-жылдын 1-февралына карата алынган маалыматка ылайык, Кыргызстанда жалпы 107 ардагер бар.
Тескемеге ылайык, Жеңиштин 77 жылдыгынын урматына Улуу Ата Мекендик согуштун ардагерлеринин төмөнкү категорияларына 100 000 сом өлчөмүндө бир жолку материалдык жардам көрсөтүлөт. Бул үчүн президенттин иш башкармалыгына өлкө башчынын фондунан жалпы 10 807 000 сом бөлүү тапшырылды.
Каражат берилчү ардагерлер:

Улуу Ата Мекендик согуштун майыптарына;

Улуу Ата Мекендик согуштун катышуучуларына;

Экинчи дүйнөлүк согуш мезгилинде фашисттер жана алардын союздаштары тарабынан түзүлгөн концлагерлердин, геттолордун жана башка мажбурлап кармоо жайларынын мурдагы жашы жете элек туткундарына;

1941-жылдын 8-сентябрынан тартып 1944-жылдын 27-январына чейинки блокада мезгилинде Ленинград шаарынын ишканаларында, мекемелеринде жана уюмдарында иштеген жана «За оборону Ленинграда» медалы менен сыйланган адамдарга жана «Жителю блокадного Ленинграда» белгиси менен сыйланган адамдарга.

Мындан тышкары, 9-майга карата жогоруда аталган категориядагы адамдарга 20 000 сом өлчөмүндө жыл сайын кошумча бир жолку акчалай жөлөк пул, ошондой эле эсептик көрсөткүчтүн алты эселенген өлчөмүндө жана төрт эселенген бир жолку акчалай жөлөк пулдарды алышат.