Мамбет Мамакеев, Кыргыз эл Баатыры, академик: Элимдин эсендигин тилейм

07.02.2017 | Ден-соолук

Кудай буюруп бул жылыбыз да жакшы өттү. Адамзатка биринчи ирет­те ден соолук менен тынччылык керек. Эгерде тынччылык болсо, калганын адамдар жасап алат, жаратып алат. Бул жылыбыз да элибиздин аманчылыгы­нын, бейпилчилигинин жылы болсун!

Мамбет МамакеевАзыр дүйнөдөгү окуяларга көз жү­гүртсөк кылымдар болуп келаткан май­да-барат согуштар болуп жатат. Адам­зат тирүү турганда согуштар боло берет турбайбы… Сириядагы согуш азга ба­саңдап калгандай. Ал ортодо дүйнөдө­гү кубаттуу эки державанын — Россия менен Американын мамилеси жаман деп айтылчу абалда турат. Мындан эки айдай мурун атомдук согуң чыгып кетиши мүмкүн деген да коркунучтуу кеп чыккан. Кудая тобо дейли, андай болгон жок. Дүйнөнү кеп кылганым, дүйнө тынч болсо биз дагы тынч бо­лобуз дегеним эмеспи… Кыргызстан­дын тышкы жана ички абалы да жаман эмес, буюрсун!

Биздин улуттук хирургиялык бор­борубуз, буюрса, калыбында иштеп жатат. Биздин жамаат атайын чогулуп алгансып жалаң гана таланттуу хирург­дардан, медсестралардан жана баш­ка жардамчы кызматкерлерден турат. Бирин -бири жамандоо, аноним кат жазуулар, ишине «жүр нары» мамиле жасоо, ж.б. жамандыктар жок. Жана­гы «бир жакадан баш, бир жеңден кол чыгарып» деген кеп дал ушул биздин жамаатка ылайыкталып айтылгандай. Чындыгында ишибиз аябагандай оор. Эгерде чын дилиңди берип иштесең, ошол оор ишиң алда канча жеңилдеп берет. Муну мен өз тажрыйбамдан билем. Жамаатыбыздагы мыктылар­дын мыктыларын санай кетейин: Ти­леков Эрнис, Акматов Таалай, Сыргаев Дүйшөн, Алыбаев Эрнис, Калжакеев Абдрасул, Самаков Алмаз, Чынгышева Жамила, Болпонова Алмагүл, Рустан­бекова Седеп, Осмоналиева Гүлжамал, Жортучиев Руслан, Абдуллаев Жакып, Иманов Болот… Ушул жерден бүтүндөй жамааттын атын атагым келет, бирок, антигө болбойт эмеспи… аты чыкпай калгандары мага таарынбайт.

Кыргыздай ыймандуу улут бул жа­рыкчылыкта жоктур деп ойлойм. Ошол ыймандык сапаттар менен чоңоюп, алар менен турмуш өтөдүк. Баарын кайдан айтмакмын, азын эскере ке­тейин.

Жолдогу жолоочуну алдынан чы­гып токтотуп ак сунуп турган, бечараны көрсө жардам берүүгө шашкан, бирөө­нүн кайгысын өзүнүкү кылып турган, барга көппөгөн, жокко чөкпөгөн, улуу­ну сыйлап, кичүүдөн ийменген, кызы созулуп төрдө олтурган, келини үйгө алды менен кирип, арты менен чыккан, ар дайым тобо келтирип, топук кыла жүргөн улут да ушул кыргыз. Кээде ту­руп кыргыз болуп жаралганыма сый­мыктанып алмайым бар.

Өзүм болсо, кудай аман койсо, ушул жылы 90го чыгам. Улуттук хи­рургиялык борборунун деректирдик кызматын уулума, медицина илимде­ринин доктору Канатка бергем, өзүм болсо «ардактуу деректирмин». Кана­тым да мени уят кылбай дурус жетекчи болуп келатат. Өмүрүн берсин… Жаш­тыгым эске түшөт. Ал кезде Бишкеги­биз Фрунзе эле. Мына ошол Фрунзеге келгем, бутумда жүн байпак менен бир тапичкеге окшогон нерсе, жонумда баштык, ичинде талкан. Бир ооз орус­ча билбейбиз. Ысык күндө баягы жүн байпагым бат эле бир капталы жыр­тылып да калды, тапичкемдин кейпи кетти. Карточка менен нан алабыз, кошумча кылып талканыбызды сууга чылап ичебиз… Мына ошондой кы­йынчылык заманда «өлсөм-талсам да окуумду бүтөм» дегем. Сөзүмө турдум. А кезде биздин дил барактай ак болчу. Эптеп курсакты тойгузуп анан билим алуубуз керек эле… Азыр эмне, элдин курсагы ток, тамакты тандап жеп кал­ган кез, тойдон-той берилип, эмне кылып шапар тебүүнү билбей жинди болуп жаткандар да толтура. Мына ушундай учурда ачкөздүк деген кү­чөйт экен, пейил кетет экен. Ушуларды ойлоп, адамдын курсагын тойгузбаш керек деп да ойлоп калам…

Мына, бүгүнкү убакка чейин күнү­нө 4-5тен операция жасайм, жалпысы­нан 30 миңден ашты го… Айта кетейин, мен жумушка, чакырган жерге, ар түр­дүү чогулуштарга… бир мүнөт кечигип көргөн жан эмесмин. Көздөгөн ишимди жасайм, берген убадамды аткарам. Буга көнүп алган кишинин аткарган иши да, дегеле жалпы жашоосу да жеңил болот. Азыр менде баары бар, мамле­кетибиздин, чет элдик сыйлыктардын түрү, «Эл баатыры», «академик» деген наамым, калың элимдин сыйы бар. Ме­нин каалаганым эле элимде тынчтык болсун, бала-чаканын жамандыгын көрбөйүн дейм…


Пикир калтырыңыз:

Тилекке каршы, сиздин браузер пикир калтырууга мүмкүндүк бербейт экен...

Тектеш макалалар: